2 – Namazi

Namazi është një nga shtyllat e besimit dhe kushti i dytë, të cilin e ka për detyrë ta kryejë çdo mysliman e myslimane. I Dërguari (a.s.), thotë: “Ai që e dallon besimtarin nga jobesimtari, është namazi. Prandaj, kush e lë namazin, ka hyrë në radhën e jobesimtarëve”.
Namazi është një adhurim, që kryhet duke bërë disa lëvizje të posaçme dhe duke lexuar pjesë prej Kuranit dhe lutje të caktuara. Namazet që duhet t’i falë çdo mysliman e myslimane që ka arritur pjekurinë, janë pesë: Namazi i sabahut, i drekës, i ikindisë, i akshamit dhe i jacisë. Çdo namaz falet në
kohën e vet (në mëngjes, në mesditë, pasdreke, në mbrëmje dhe natën).
Për të qenë namazi i plotë dhe i pranuar te Allahu (xh.sh.), duhen plotësuar dymbëdhjetë kushte:

Gjashtë kushte, para se të fllojmë namazin:
1 – Të pastrohen trupi, rrobat dhe vendi ku do të falemi,
2 – Të merret abdesti,
3 – Të mbulohen pjesët e turpshme të trupit,
4 – Të falësh namazin në kohën e caktuar,
5 – Të drejtohesh nga kibla,
6 – Të bësh njetit (të caktosh qëllimin).

Gjashtë kushte, brenda namazit:
1 – Të bësh tekbirin fllestar,
2 – Të qëndrosh në këmbë,
3 – Të këndosh Kuran,
4 – Të përkulesh në ruku,
5 – Të biesh në sexhde,
6 – Të qëndrosh në uljen e fundit.